अक्षय कुमारको फिल्म ‘लक्ष्मी’ यसकारण याद गरिनेछ किनभने यति ठूलो स्टारकास्ट हुँदा पनि यो पहिलो फिल्म हो जुन सिनेमाघरको साटो सिधै ओटीटी प्लेटफर्ममा रिलिज भयो । महिनौ अघिदेखि तयार यो फिल्म कोरोनाभाइरस र लकडाउनका कारण अड्किएको थियो र अन्ततः यसलाई ओटिट प्लेटफर्ममा रिलिज गरियो । फिल्म रिलिजका लागि भारतमा दिवालीको समय चुनियो र ९ नोभेम्बरमा फिल्म प्रदर्शन गरियो । फिल्मले पहिलो दिन नै रेकर्ड तोड भ्यूअर पायो तर दर्शकलाई यो फिल्म खासै मन परेन । आखिर यसको के कारण होला ? एक भारतीय सञ्चार माध्यमले पाँच कारण लेखेको छ ।

१. आशा गरेभन्दा कमः

लक्ष्मी फिल्म दक्षिण भारतीय फिल्म कंचनाको हिन्दी रिमेक हो । कंचनाको डब्ड भर्सन दर्शकले थुप्रै पटक हेरे । उनीहरुले लक्ष्मी फिल्म कंचनाभन्दा पनि राम्रो होला भन्ने सोचे । तर लक्ष्मी फिल्म कंचना जत्तिको पनि हुन सकेन ।

२. मनोरञ्जन गायबः

लक्ष्मीलाई हररका साथै कमेडी फिल्मको रुपमा प्रचार गरिएको थियो । तर फिल्मका कमेडी दृश्य यस्ता छन्, जुन हेर्दा हाँसो उठ्दैन । हरर दृश्य हेर्दा डर लाग्दैन । मनोरञ्जनको हिसाबले फिल्म रित्ता देखियो । विशेषगरी पहिला एक घण्टा त पट्यार लाग्दो नै छ ।

३. हतारोः

फिल्म हेर्दा यस्तो लाग्छ कि यो निकै हतारमा बनाइएको छ । पात्रलाई राम्रोसँग विकास गरिएको छैन जसका कारण उनीहरुले दर्शकले खासै कमाल गर्न सक्दैनन् ।

४. तर्क बग्यो खोलामाः

फिल्ममा थुप्रै पटक तर्क गायब भएको देख्न सकिन्छ । कतिपय अवस्थामा यो निकै अवैज्ञानिक पनि देखिन्छ । हुन त यस्ता फिल्म हेर्दा दिमाग घरमा नै छोड्नुपर्ने बताइन्छ तर दर्शकलाई यति मूर्ख पनि सोच्नु हुँदैन ।

५. ओभर एक्टिङः

फिल्ममा थुप्रै राम्रा कलाकार छन् तर निर्देशक राघव लरेन्सले उनीहरुलाई मज्जाले ओभर एक्टिङ गराएका छन् । अक्षय कुमार पनि थुप्रै पटक यसको शिकार भए । तसर्थ, दर्शकलाई यो ‘तमाशा’ रत्तिभर पनि मनपरेन ।