काठमाडौँ बसेर अध्ययन गर्दै आएकी इलामकी २१ वर्षीया रोजिना (नाम परिवर्तन) यतिबेला गाउँमै छिन् । लकडाउनको कारण रोजिनाको आफ्नो प्रेमीसँग भेट हुन सम्भव छैन । रोजिनाको प्रेमी चाहिँ काठमाडौँमै बस्छन् ।

काठमाडौँमा रहँदा उनी र उनका प्रेमी प्रायः डेटिङ जान्थे । एकान्तमा बसेर भावना साटासाट गर्दा उनलाई पनि रमाइलै लाग्थ्यो । एक दिन उनका प्रेमीले काठमाडौँस्थित गौशालामा रहेको आफ्नो कोठामा जान प्रस्ताव गरे । उनले सहजै स्वीकार गरिन् ।

सुनसान कोठामा फकाईफुलाई प्रेमीले रोजिनासँग शारीरिक सम्बन्ध राखे । त्यतिमात्र नभइ रोजिनाको नाङ्गो तस्बिरहरु पनि खिच्न भ्याए । रोजिनाको उक्त नग्न फोटो विदेशमा रहेका नेपालीहरु समक्ष पुगेको पाइएको छ ।

‘नग्न फोटो’ प्रेमीले नै पठाएका थिए

लकडाउनको कारण प्रेमिका गाउँमा रहेको मौकामा ‘रोजिना’ नामको फेसबुक आईडी खोले । त्यही फेसबुकमार्फत् उनी अर्थात रोजिनाको कथित प्रेमीले स्वदेश तथा विदेशमा रहेका नेपाली केटाहरुसँग म्यासेन्जरमा च्याट गर्थे ।

रोजिना नामको फेसबुकबाट विदेशमा रहेका जो कोही केटाहरुसँग भावुक कुराहरु हुन्थ्यो । तर, के थाहा विदेशमा रहेका केटाहरुलाई त्यो ‘रोजिना’ नामको फेसबुक आईडी नक्कली हो भनेर ।

आफ्नो प्रेमिकालाई कोठामा लिएर गएको बेला खिचेको त्यही ‘नग्न फोटो’ विदेशमा रहेका नेपालीलाई उनले पठाउथे उता विदेशमा केटाहरु पनि केटी नै हो भन्ठानेर मख्ख पर्दै गफिन्थे ।

नाङ्गो फोटो पठाउनुको पनि कारण थियो, ‘विदेशमा रहेका नेपालीसँग पैसा असुल्नु ।’ विदेशमा रहेका धेरैले रोजिनाको ‘नग्न फोटो’ हेरेबापत पैसा पनि पठाइदिन्थे । पोज–पोजको फोटो पठाउन समेत भन्थे । उनले पनि प्रेमिका (रोजिना) को नाङ्गो फोटोहरु पठाइदिन्थे । पैसा असुलिरहन्थे ।

यता, आफ्नो ‘न्युड फोटो’ विदशेमा रहेको पुरुषहरुसमक्ष पुगेको छ भन्ने कुरा गाउँमा रहेकी रोजिनालाई के थाहा ? तर पनि प्रहरीकोमा पुगेपछि मात्रै रोजिनाले घटनाबारे जानकारी पाइन् ।

साइबर क्राइमको धम्कीपछि खुल्यो पोल

एकदिन मलेसियामा रहेका एक युवकलाई सोही आईडी (रोजिना)बाट रिक्वेष्ट जान्छ । प्रोफाइल चेक गर्दा केटीकै लागेर एसेप्ट हुन्छ । तत्कालै ‘हेल्लो’ भन्दै रोजिनाले म्यासेज गर्छिन् । केटीको म्यासेज देख्नासाथ ‘हाई’ भन्दै उताबाट रिप्लाई आउँछ ।

उनीहरु कुराकानीकै क्रममा नजिक हुन्छन् । उनीहरुबीच प्रेमी–प्रेमिकाले गर्ने जस्तै कुराकानीहरु पनि हुन थाल्छ । रोजिनाले भावुक खालको कुरा गर्थिन् । एकदिन ती युवकले ‘फोटो’ पठाउन भन्छन् ।

तर, रोजिनाले तत्कालै ‘नग्न फोटो’ पठाइदिन्छिन् । त्यतिबेला ती युवकले ‘न्युड फोटो’ नभई सामान्य फोटो पठाउन भनेका थिए । तर, रोजिनाले ‘नग्न फोटो’ पठाएपछि ती युवकले अरु पनि पठाउन आग्रह गर्छन् । रोजिनाले थप चार–पाँच वटा ‘न्युड फोटो’हरु पठाउँछिन् । ती न्युड फोटो फेसबुकको प्रोफाइलमा राखिएको केटीको नै थियो । युवक झनै विश्वस्त हुन्छन्, यो केटी नै हो ।

उनीहरुको दिनहुँ च्याटमा कुराकानी हुन्थ्यो । तर, भिडियो कल र अडियो भने कहिले पनि हुँदैनथ्यो । युवकले भिडियो कल गर्न आग्रह गरेपनि रोजिनाले परिवार सँगै छु बोल्न नमिल्ने भन्दै टार्दै आउँथिन् ।

‘नग्न फोटो’ पठाएकी रोजिनाले केही दिनपछि ती युवकसँग पैसा सापट माग्छिन् । ती युवकले अहिले आफ्नो तलब नआएको र पछि पठाइदिन्छु भन्दै आश्वस्त पार्न खोज्छन् । लास्टै गाह्रो भएको भन्दै रोजिनाले फेरि दुःख पोख्छिन् ।

अहिले कतैबाट म्यानेज गर भन्दै रोजिनालाई सम्झाउन खोज्छन् ती युवक । पैसा नआउने भएपछि रोजिनाले ‘साइबर क्राइम’ को मुद्दा हाल्दिम भन्दै युवकलाई डर देखाउँछिन् । ७० हजार नेपाली रुपैयाँ माग्छिन् ।

अनि ती युवकलाई शंका लाग्छ । त्यो रोजिना नामको फेसबुक आईडी नक्कली हुनसक्छ । तत्कालै ती युवकले घटनाबारे नेपालमा रहेका आफ्नो दाईलाई जानकारी गराउँछन् ।

यसरी पक्राउ परे अभियुक्त एकराम राई

गत हप्ता महानगरीय अपराध महाशाखा टेकुमा ती युवकको दाई घटनाको विवरण लिएर पुग्छन् । तत्कालै रोजिना नामको फेसबुक आईडीबारे प्रहरीले अनुसन्धान थाल्छ ।

‘रोजिना’ नामको फेसबुक कहाँबाट चलेको छ भन्ने महाशाखाको टोलीले पत्ता लगाउँछ । र, ती युवकलाई प्रहरीले ७० हजार नेपाली रुपैयाँ आईएमईमार्फत रोजिनालाई पठाइदिन भन्छ ।

रोजिनाले भने आफ्नो नाममा नभएर अर्का कै नाममा पैसा पठाउन भन्छ । मलेसियाबाट ती युवकले रोजिनाले भनेको व्यक्तिको नाममा नै पैसा पठाइदिन्छन् ।

पैसा झिक्न गएको मौकामा ती व्यक्ति अपराध महाशाखाको फन्दामा पर्छन् । ती व्यक्तिलाई नियन्त्रणमा लिएर सोधपुछ गर्दा रोजिना नामको केटी ती युवकको प्रेमिका रहेको खुल्छ ।

प्रेमिकाको नाममा नक्कली आईडी खोलेर विदेशमा रहेका २ दर्जन पुरुषहरुलाई ‘नग्न फोटो’ पठाएर पैसा मागेको अभियुक्तले स्वीकार गर्छन् । र, ती अभियुक्त अर्थात् कथित प्रेमीचाहिँ खोटाङ घर भएका एकराम राई हुन्, जो यतिबेला प्रहरीको नियन्त्रणमा छन् ।

‘फेसबुक च्याटमा कुराकानी हुँदा फोटो पठाऊ भन्थे,’ एकरामले भनेका छन्, ‘मैले पनि केही पनि नसोची फोटो पठाइरहेँ । पैसा कमाउनको लागि गलत बाटो रोजेँ कि भन्ने पनि सोच्ने गर्थेँ, तै पनि सही बाटो रोज्न सकिनँ ।’

एकरामका अनुसार हालसम्म विदेशमा रहेका २ दर्जनभन्दा बढी पुरुषहरुलाई प्रेमिकाको ‘नग्न फोटो’ पठाएर पैसा मागेका छन् । कति पुरुषले पैसा पनि पठाएका छन् भने कतिले पछि पठाउँछु भनेका थिए ।

घटनाबारे रोजिना अनभिज्ञ थिइन्

विदेशमा रहेका पुरुषलाई आफ्नै नग्न तस्वीर पठाएको कुरा रोजिनालाई थाहा नभएको एकरामले बताएका छन् । महाशाखाका एसएसपी दीपक थापाका अनुसार कथित प्रेमी राईले प्रेमिकाको नग्न तस्वीर पठाएर असुली धन्दा नै चलाएका थिए ।

प्रेमिका गाउँमा रहेको मौकामा पैसा कमाउने उद्देश्यले यस्तो काम गरेको राईले प्रहरी समक्ष बयान दिएको भन्दै त्यसबारे एकरामकी प्रेमिका रोजिनालाई खबर गरिसकेको एसएसपी थापाले बताए ।

रोजिनाले आफ्नो नाङ्गो फोटो सामाजिक सञ्जालमा भाइरल बनाइदिने प्रेमी एकरामविरुद्ध साइबर अपराधमा मुद्दा दर्ता गर्ने तयारी गरेकी छन् । ‘विश्वास गरेको मान्छेले त यतिसम्म गर्छ भने अरुको के विश्वास ?,’ रोजिना भन्छिन्, ‘घरपरिवारलाई घटनाबारे खबर गरेर प्रहरीमा जाहेरी दिँदैछु ।’

गौशालास्थित कोठाबाटै पक्राउ परेका एकराममाथि थप अनुसन्धान भइरहेको प्रहरीले जनाएको छ ।

‘नग्न फोटो’ पठाउने र पैसा असुल्नेको गिरोह नै सक्रिय

काठमाडौँमै बस्दै आएका एक प्रेमी–प्रेमिका मिलेर पनि ‘नग्न फोटो’ पठाउँदै पैसा असुल्ने कार्यमा संलग्न रहेको पाइएको एसएसपी थापाले बताए । उनले भने, ‘उनीहरुले नेपालमै रहेका पुरुषहरुलाई ‘नग्न फोटो’ पठाउने र पैसा असुल्ने गरेका छन् ।’

केटाकेटी मिलेर विदेशमा रहेका पुरुषहरुलाई भन्दा पनि नेपालमै रहेका पुरुषहरुलाई ‘नग्न फोटो’ पठाउँदै पैसा बार्गेनिङ गर्नेको गिरोह काठमाडौँमा सक्रिय रहेका पाइएको र त्यसबारे अनुसन्धान भइरहेको एसएसपी थापाले बताए ।

‘फेसबुकको वालमा प्रेमिकाको फोटो राखेर प्रेमी–प्रेमिका नै मिलेर पैसा असुली धन्दा गरिरहेको पनि पाइएको छ । प्रविधिको बढ्दो प्रयोगसँगै नयाँ–नयाँ समस्याहरु सिर्जना हुँदै गएको प्रहरीको अनुसन्धान र प्राप्त भएको उजुरीले देखाउँछ,’ एसएसपी थापाले भने, ‘कथाजस्ता लाग्ने घटना फेसबुक र सामाजिक सञ्जालबाटै हुने गरेको छ ।’

महाशाखाका एसपी होबिन्द्र बोगटी यसको सिकारमा स्कुले उमेरका केटाकेटीदेखि कलेज पढ्ने युवायुवतीसम्म परेको बताउँछन् । लकडाउनको अवधिमा यस्तो घटनाहरु बढ्दो रहको एसपी बोगटी बताउँछन् । ‘घरमै दिनभरी बस्ने र काम नभएको बेला मान्छेलाई के गरौं के गरौं हुन्छ,’ एसपी बोगटीले भने, ‘अन्ततः मान्छे डिप्रेसनमा जाने र दिमागले पुरै नकारात्मक सोच्छ र यस्ता अपराधहरु हुन्छन् ।’