मोरङ। सामाजिक संगठन मोरङको आयोजनामा सम्पन्न ‘सबैलाई शिक्षा चाहिन्छ, शिक्षाबाट सबैथोक पाइन्छ’ कार्यक्रममा बुढीगंगा गाउँपालिकाका अध्यक्ष जितनारायण थापामगरले आगामी आर्थिक वर्षदेखि पालिकाका जेहेन्दार ७ जना छात्राहरूलाई स्टाफ नर्स छात्रवृत्ति दिने घोषणा गरेका छन्।

कार्यक्रमलाई सम्बोधन गर्दै अध्यक्ष थापामगरले सामुदायिक विद्यालयप्रति अभिभावक र विद्यार्थीको आकर्षण बढाई दक्ष जनशक्ति उत्पादन गर्ने पालिकाको उच्च प्राथमिकता रहेको बताए। यस योजनालाई सफल बनाउन अभिभावक, संघसंस्था र सरोकारवालाबीच सहकार्य आवश्यक रहेको उनले उल्लेख गरे।

शिक्षा क्षेत्रको प्रवर्द्धनका लागि पालिका सक्रिय रहेको बताउँदै उनले गुणस्तरीय शिक्षा सुनिश्चित गर्न समुदायको साथ आवश्यक रहेकोमा जोड दिए।