बिराटनगर। जनमत पार्टीले मधेश केन्द्रित दलहरुबीच सहकार्य र मोर्चाबन्दीको पहल गर्न दुई सदस्यीय कार्यदल गठन गरेको छ।

पार्टीको केन्द्रीय उपाध्यक्ष अब्दुल खान र प्रवक्ता डा. शरदसिंह यादव रहेको कार्यदललाई दलहरुबीच संवाद र सहकार्यलाई अघि बढाउने जिम्मेवारी दिइएको छ। पार्टीको केन्द्रीय सचिवालय समितिको निर्णयअनुसार संविधान संशोधनलगायतका मुद्दामा साझा धारणा बनाउन मोर्चाबन्दीका लागि कार्यदल गठन गरिएको जनमत पार्टीद्वारा जारी विज्ञप्तिमा उल्लेख छ।

यसअघि आइतबार लोकतान्त्रिक समाजवादी पार्टी (लोसपा) नेपालले पनि कार्यगत एकता र समान राजनीतिक सिद्धान्त भएका दलहरूसँग पार्टी एकीकरणका लागि समिति गठन गरेको थियो।

मधेश केन्द्रित दलहरुबीचको सहकार्यलाई तिव्रता दिन जनमत पार्टीको यो कदमलाई महत्वका साथ हेरिएको छ।