विराटनगर। विराटनगर महानगरपालिकाले आर्थिक वर्ष २०८०/८१ को वार्षिक प्रगति समीक्षा कार्यक्रम सफलतापूर्वक सम्पन्न गरेको छ। दुई दिनसम्म चलेको यस कार्यक्रममा महानगरभित्रका स्वास्थ्य संस्थाहरूको प्रगति, आन्तरिक गतिविधि र विभिन्न स्वास्थ्य सेवाहरूको विस्तृत समीक्षा गरिएको थियो।

पहिलो दिन महानगरपालिकाभित्रका स्वास्थ्य संस्थाहरूको प्रगतिमा केन्द्रित रहेर छलफल भएको थियो भने दोस्रो दिन कोशी अस्पतालसहित अन्य सरकारी, निजी तथा गैरसरकारी स्वास्थ्य संस्थाहरूको प्रगति विवरण प्रस्तुत गरिएको थियो।

यस कार्यक्रममा प्रमुख प्रशासकीय अधिकृत राजेन्द्र पराजुली, सामाजिक समिति संयोजक काजी बहादुर बस्नेत, स्वास्थ्य महाशाखा संयोजक दिलिप कुमार यादव, तथ्याङ्क अधिकृत दिपक भट्टराई, प्रदेश स्वास्थ्य मन्त्रालयका विभागीय प्रमुख, स्वास्थ्य कार्यालय मोरङका प्रमुख डा. सुरेश मेहता, जनस्वास्थ्य अधिकृत उत्सव पोखरेल, र खोप अधिकृत खेहरु यादवसहित विभिन्न स्वास्थ्यकर्मीहरूको उपस्थिति रहेको थियो।

कार्यक्रमको समापनमा विगत वर्षमा स्वास्थ्य क्षेत्रमा हासिल उपलब्धिहरूको मूल्यांकन गर्दै, आगामी दिनमा थप प्रभावकारी सेवा प्रवाहका लागि रणनीति तय गरिएको जानकारी दिइयो।