मोरङको पथरी शनिश्चरे नगरपालिकामा डेंगु रोगको रोकथाम तथा नियन्त्रण सम्बन्धि अन्तरक्रिया सम्पन्न भएको छ । गरिब तथा सीमान्तकृत समुदायको स्वास्थ क्षेत्रमा कार्यरत विश्वास परियोजना र सहारा नेपालको सहयोगमा पथरीशनिश्चरे नगरपालिकाको स्वास्थ्य शाखाद्वारा आयोजित अन्तरक्रियामा डेंगु रोगको रोकथाम तथा नियन्त्रण सम्बन्धमा छलफल भयो ।

पथरीशनिश्चरे नगरपालिकाको सभाहलमा आयोजित कार्यक्रममा स्थानीय जनप्रतिनिधिहरु , सरोकारवालाहरू सहित विभिन्न क्षेत्रका प्रतिनिधिहरूको सहभागिता रहेको थियो । कार्यक्रममा डेंगु रोग सम्बन्धी जनचेतना अभिवृद्धि , रोकथामका उपायहरू र समुदायस्तरमा गर्न सकिने प्रयासहरूका बारेमा छलफल भएको थियो ।

अनतरक्रियामा पथरी शनिश्चरे नगरपालिका स्वास्थ शाखाका कर्मचारी जगत लिम्बुले स्वागत मनतव्य राख्दै डेंगु रोगका बारेमा प्रकाश पारेका थिए । उनले गत वर्ष नगरमा ५ हजार २ सय ८९ जनाको डेंगु परिक्षण गर्दा १९०२ जना संक्रमित भेटिएको र १ जनाको मृत्यु भएको तथ्यांक प्रस्तुत गरेका थिए भने यसवर्ष हालसम्ममा १ जनामा मात्रै डेंगु संक्रमण पुष्टि भएको जानकारी दिए ।

कार्यक्रममा बोल्दै वडा नंं १ का अध्यक्ष भिम कुमार राईले सबैको पहल र सक्रियतामा मात्रै डेंगु नियन्त्रण गर्न सकिने उल्लेख गर्दै समुदायको पहलमा डेंगु नियन्त्रण गरिनुपर्ने बताए । पथरीशनिश्चरे नगरपालिकाका प्रमुख मोहन प्रसाद तुम्वापोको अध्यक्षतामा आयोजित कार्यक्रममा , उपप्रमुख देविमाया काफ्ले सहित कार्यपालिका सदस्यहरुको समेत उपस्थिति रहेको थियो । कार्यक्रममा जिल्ला जनस्वास्थ्य कार्यालय मोरङका प्रमुख डाक्टर सुरेश मेहताले डेंगु रोग र यसको रोकथाम तथा नियन्त्रणका बारेमा सहजीकरण गरेका थिए ।