हिपमत डटकम
एजेन्सी : चीनमा कोरोना नियन्त्रणका लागि जारी कडा प्रतिबन्धविरुद्धको आन्दोलन चर्केको छ । राजधानी बेइजिङ र वित्तीय केन्द्र सांघाई सहरमा सयौँ प्रदर्शनकारीहरू जम्मा भएर प्रदर्शन गरेका छन् ।
प्रदर्शन छेन्दु र सिआनका दक्षिण–पश्चिम सहरहरू र वुहानमा पनि शुरु भएको छ । करिब तीन वर्षअघि वुहानबाटै कोरोना संक्रमण शुरु भएको थियो ।
प्रदर्शनकारीहरुले राष्ट्रपति सी जिनपिङको राजीनामा समेत मागेका छन् । कम्युनिष्ट पार्टीका महासचिवको सार्वजनिक आलोचना गर्नेलाई चीनमा जेल सजाय हुनसक्छ ।
प्रदर्शनकारीहरूले राष्ट्रपति सीको शून्य कोरोना नीतिमाथि प्रश्न उठाएका छन् । उनीहरुले सामूहिक परीक्षण, क्वारन्टिन र लकडाउन जस्ता प्रतिबन्धको विरोध जनाएका हुन् ।
उरुम्चीस्थित एक अपार्टमेन्टमा आगलागी हुँदा कम्तीमा १० जनाको मृत्यु भएपछि कोरोनाको निषेधाज्ञाविरुद्ध प्रदर्शन शुरु भएको हो । केन्द्रीय सरकारविरुद्ध प्रश्न उठाउँदै चीनमा अहिलेसम्मकै ठूलो प्रदर्शन भएको बताइएको छ ।
प्रदर्शनका क्रममा धेरै प्रदर्शनकारीहरूले खाली ब्यानरहरू समातेको दृश्य देखिएको छ । आफ्नो असन्तुष्टि व्यक्त गर्नका लागि सेतो कागज र खाली ब्यानर बोकेको प्रदर्शनकारीको भनाइ छ ।
चीनका लाखौं मानिसहरू तीन वर्ष लामो प्रतिबन्धबाट आजित भएका छन् । अहिले उनीहरूको निराशा उत्कर्षमा पुगेको अन्तर्राष्ट्रिय सञ्चारमाध्यमले जनाएका छन् ।
१.
२.
३.
