श्रद्धा हत्या प्रकरणको अनुसन्धानमा एक कदम अगाडि बढ्दै दिल्ली प्रहरीले बिहीबार मुख्य आरोपी आफताब पूनावालाको पोलिग्राफ टेस्ट गरेको छ ।

यस क्रममा अफताबलाई यो हत्या प्रकरण र उनको परिवार र बाल्यकालसँग सम्बन्धित प्रश्न सोधिएको थियो ।

इन्डियन एक्सप्रेसमा प्रकाशित समाचार अनुसार दिल्ली प्रहरीले आफताबलाई पहिलो सेशनका लागि दिउँसो रोहिणी लगेको थियो ।

यसैबीच, दिल्ली पुलिसले अफताबको फ्ल्याटबाट धेरै धारिलो वस्तुहरू फेला पारेको छ, जसलाई परीक्षणको लागि फरेन्सिक प्रयोगशालामा पठाइएको छ ।

एक प्रहरी अधिकारीले पत्रिकालाई भने, ‘हामी यी चीजहरूमा रगतको निशान खोजिरहेका छौं । पूनावालाले श्रद्धाको शरीरलाई ३०–३५ टुक्रामा काट्न दुई–तीनवटा साना आरा प्रयोग गरेको बताए । त्यो हतियार हामीले अहिलेसम्म फेला पार्न सकेका छैनौं । हामी उनको दाबीको अनुसन्धान गर्नेछौँ ।’

यस्तै, पोलिग्राफ परीक्षणको उद्देश्य बताउँदै, फोरेन्सिक टोलीसँग सम्बन्धित एक अधिकारीले द इन्डियन एक्सप्रेसलाई भने, ‘यसको उद्देश्य हत्यामा प्रयोग गरिएको हतियार पत्ता लगाउनु हो । यससँगै यसको उद्देश्य श्रद्धाको फोन र उनको शरीरका टुक्राहरू फेला पार्नु पनि हो ।’

‘यस क्रममा हामीले उनीहरुको सम्बन्धसँग सम्बन्धित प्रश्न सोधेका थियौँ । आफताबलाई उनको बाल्यकाल, परिवार, सम्बन्ध, उनले श्रद्धा वाल्करको हत्या गरेको हो कि होइन, हो भने किन र प्रमाण कहाँ लुकाए भन्ने प्रश्न सोधिएको थियो । ’

टोलीका अधिकारीले अब आफ्नो टोलीले यी जवाफहरूको सामग्री अध्ययन र विश्लेषण गर्ने र त्यसपछि प्रहरीलाई जानकारी दिने पनि बताएका छन्।

यस विषयमा अनुसन्धान गर्दा दिल्ली प्रहरीको टोलीले दिल्लीदेखि महाराष्ट्रसम्मको जङ्गल, ताल र नदी नालामा प्रमाण खोजिरहेको छ ।

दिल्ली प्रहरीका एक अधिकारीले भनेका छन्, ‘यदि हत्यापछि अफताब मुम्बई आएको भए उसले श्रद्धाको सामान र अन्य प्रमाणहरू वसई वा ठाणेमा फालिदिएको हुन सक्छ ।’

मुम्बईमा प्रमाण खोज्ने क्रममा एक स्रोतले भनेको छ, ‘आफताबले दाबी गरेका छन् कि उनले श्रद्धाको सिमकार्ड दिल्लीमा र फोन भयंदर नजिकै समुद्रमा फ्याँकेका थिए । हामीले थाहा पाएका छौं कि उनी आफ्ना आमाबुवालाई वसईबाट मीरा रोडमा सार्न मुम्बई आएका थिए । उनले रेलबाट यात्रा गरिरहेका बेला फोन समुद्रमा फ्याँकेको हुनसक्ने देखिएको छ ।’

तर, हालसम्म दिल्ली पुलिसले यस मामिलामा कुनै महत्त्वपूर्ण प्रमाण प्राप्त भएको जानकारी दिएको छैन ।

दिल्ली पुलिसले दक्षिण दिल्लीको जंगल र नालीबाट केही हड्डीहरू फेला पारेको छ, जसको फोरेन्सिक टोलीले अनुसन्धान गरिरहेको छ ।

तर हालसम्म त्यस्तो कुनै पनि कुरा बाहिर आएको छैन जसको आधारमा यस विषयमा ठोस रुपमा केही भन्न सकिन्छ ।