बारा । बाराको सिम्रोनगढ नगरपालिका वडा नं. ९ नहर इलाका बाट २ थान म्यागजिन सहित २ जना भारतीयलाई प्रहरीले पक्राउ गरेको छ । छिन्नमस्ता बाहिनीबाट खटिएको सशस्त्र प्रहरी बलको टोलीले बिहीबार बेलुका उनीहरुलाई पक्राउ गरेको हो ।

बी आर ५०५ ए जे ४४२० भारतीय नम्बर प्लेटको मोटरसाइकलमा उनीहरु नेपाल प्रवेश गरेका थिए । संकास्पद देखिएका उनीहरुलाई विशेष सुराकीको आधारमा पक्राउ गरिएको सशस्त्र प्रहरी बल प्रदेश नम्बर दुईका प्रमुख डिआइजी गणेश ठाँडा मगरले जानकारी दिनु भयो ।

डिआइजी मगरका अनुसार खान तलासी गर्दा १ थान अटोमेटिक पेस्तोल, ३ राउण्ड गोली र २ वटा म्यागजिन बरामद भएको हुँदा उनीहरुलाई पक्राउ गरिएको हो । पक्राउ पर्नेमा भारत बिहार राज्यको पूर्वी चम्पारण मोतिहारीका २१ वर्षीय चन्दन राम र २० वर्षीय अभिषेक कुमार रहेको छ ।

पक्राउ परेका ती दुबै भारतीयमाथी आवश्यक अनुसन्धान भई रहेको प्रहरीले जनाएको छ ।