हिपमत डटकम
इनरुवा ,पौष १७
पत्रकार याम प्रधानको निधन भएको छ । मिर्गौला रोगबाट पीडित प्रधानको ५२ वर्षको उमेरमा आफ्नै निवास इटहरीमा निधन भएको हो ।
पत्रकार प्रधान राष्ट्रिय समाचार समिति इटहरीका समाचारदाता हुन् । उनी सुनसरीका पुराना पत्रकारका रुपमा पनि परिचित छन् । उनी प्रेस स्वतन्त्रता सेनानी पनि हुन् ।
उनलाई सुनसरीमा पत्रकारिताका गुरुसमेत मानिन्थ्यो । प्रधान नेपाल पत्रकार महासंघ सुनसरीका पूर्वसभापतिसमेत हुन् । उनको निधनले नेपाली पत्रकारिता इतिहासमा अपूरणीय क्षति भएको नेपाल पत्रकार महासंघ सुनसरीले जनाएको छ ।
लामो समयदेखि मृगौला रोगबाट पीडित उनी घरमै उपचार गराइरहेका थिए । प्रेस युनियनमा समेत उनको आबद्धता थियो । उनको निधनप्रति नेपाल पत्रकार महासङ्घ, प्रेस युनियन, प्रेस सङ्गठनलगायतले दुःख प्रकट गर्दै हार्दिक श्रद्धाञ्जलि व्यक्त गरेका छन् ।
उनको आज बिहान ९ बजे गङ्गा जमुना मुक्ति घाटमा दाहसंस्कार गरिने पत्रकारमहासंघ सुनसरीले जानाएको छ । उनका एक छोरी र श्रीमती छन् ।
adv-2
१.
२.
३.
