काठमाडौँ। जलवायु न्यायको माग गर्दै युवा–युवतीको समूहले ललितपुरको जावलाखेलमा र्‍याली निकालेको छ। “पिपुल्स क्लाइमेट मार्च २०२४” नाम दिइएको यस र्‍यालीमा दर्जनौँ सहभागीले ब्यानर र प्ले कार्डसहित नारा लगाउँदै सहभागी भएका छन्।

उनीहरूले विकसित मुलुकहरूलाई खनिज, पेट्रोलियम र औद्योगिक उत्सर्जनका कारण प्रदूषण बढाउने मुख्य जिम्मेवार ठहर गर्दै, नेपालजस्ता देशलाई क्षतिपूर्ति तिर्नुपर्ने माग गरेका छन्।

साथै, विकसित राष्ट्रहरूले नेपालजस्तो कम हरितगृह ग्याँस उत्सर्जन गर्ने देशलाई ऋणको रूपमा सहायता दिन खोज्नुको विरोध गरेका छन्। नेपालमा भएको यो मार्च “ग्लोबल विक अफ एक्सन इन साउथ एसिया” को सन्दर्भमा आयोजना गरिएको हो।