नयाँ दिल्ली: श्रद्धा कपूर, राजकुमार राव, र पंकज त्रिपाठी अभिनीत हरर-कमेडी फिल्म “स्त्री २” यस वर्षको बलिउडको सबैभन्दा ठूलो हिट फिल्म बनेको छ। फिल्मले पहिलो हप्तामै बक्स अफिसमा ठूलो सफलता प्राप्त गर्यो र दोस्रो हप्तामा पनि राम्रो प्रदर्शन गर्दै छ।

फिल्मले बक्स अफिसमा अहिलेसम्म थुप्रै रेकर्ड तोडिसकेको छ र दर्शकहरूले अझै पनि यसलाई धेरै मन पराइरहेका छन्। “स्त्री २” अब ४०० करोड क्लबमा समाविष्ट भएको छ। यो उपलब्धि ११ दिनमै प्राप्त भएको हो।

यससँगै, “स्त्री २” ले सनी देओलको “गदर २”, प्रभासको “बाहुबली २ः द कन्क्लूजन”, र यशको “केजीएफ २” जस्ता ब्लकबस्टर फिल्मलाई पछाडि पारिदिएको छ। फिल्मको रिलिज अगस्ट १५ मा भएको थियो।

फिल्मको दोस्रो दिनमै सय करोडको आँकडा पार गरियो र २०० करोड क्लबमा पुग्नलाई मात्र चार दिन लागेको थियो।

यस उपलब्धिसँगै, “स्त्री २” भारतीय सिनेमामा ४०० करोडको आँकडा पार गर्ने तेस्रो फिल्म बनेको छ, जसले शाहरुख खानको “पठान”सँग बराबरी गरेको छ। तर, यो फिल्म शाहरुखको “जवान” र रणवीर कपुरको “एनिमल” भन्दा पछाडि छ, जसले क्रमशः ९ र १० दिनमा यो उपलब्धि हासिल गरेका थिए।