काठमाडौँ । असार १५ गतेबाट प्रदर्शनको तयारीमा रहेको फिल्म ‘परस्त्री’ को पहिलो गीत ‘माया बस्यो तिमीसँग’ सार्वजनिक गरिएको छ । गीतमा केतन क्षेत्री र निखिता थापाको स्वर छ । केके ब्रोदर्स अर्थात कोशिस र केतन क्षेत्रीको शब्द तथा संगीत रहेको गीतमा संगीत संयोजन उदय राज पौडेलको रहेको छ ।

गीतको भिडियोमा शिल्पा मास्के र अभिनेता गौरव बिष्टलाई फिचर्ड गरिएको छ । मुस्ताङका रमणीय स्थानमा छायांकन भएको फिल्ममा शिल्पा र गौरव रोमान्टिक मुडमा देखिएका छन् । नेपाली र हिन्दीमा रिलिज हुने फिल्म विवाहेत्तर सम्बन्धले निम्त्याउने पारिवारिक र सामाजिक कथावस्तुमा निर्माण भएको हो । सुरज पाण्डले फिल्म निर्देशन गरेका हुन् ।

फिल्ममा शिल्पा र गौरवका अलवा कोशिस क्षेत्री, अलिसा क्षेत्री, अशान्त शर्मा, रामबाबु रेग्मी, सरस्वती अधिकारी, झकेन बिसी र अर्पित न्यौपानेको अभिनय छ । डीएस डिजिटलको ब्यानरमा निर्माण भएको फिल्ममा शर्मिला पाण्डेको निर्माणमा सहकार्य छ । दीपेन्द्र के खनाल फिल्मका लेखक पनि हुन् ।